Espaço Irmandinho é umha rede nacional de independentistas galegas e galegos surgida em Dezembro de 2005 como fruto da necessidade experimentada por dezenas de militantes de coordenar e globalizar a sua intervençom social e política nas distintas frentes de intervençom, da defesa da Terra ao sindicalismo nacionalista, do movimento juvenil ao feminista, do trabalho político à construçom de meios próprios de comunicaçom, dos centros sociais à luita por um país onde o galego seja língua socialmente hegemónica, etc.
Espaço Irmandinho procura umha renovaçom prática das modalidades de intervençom sócio-política tradicionais, apostando num modelo em que a organizaçom militante mais do que finalidade em si própria limita as suas aspiraçons a ser umha ferramenta útil ao serviço do País, da construçom e dinamizaçom de movimentos populares de contestaçom e do artelhamento permanente do Movimento de Liberaçom Nacional Galego (MLNG).
Espaço Irmandinho minimiza por própria decisom a sua presença pública, umha vez que priorizamos os critérios de efectividade da intervençom social e política sobre a projecçom externa e a publicidade partidária.
Desde o VII Encontro Nacional celebrado em Fevereiro de 2009 a nossa rede tomou a decisom de iniciar um processo de transformaçom progressiva numha organizaçom política focada a impulsionar os movimentos e projectos populares galegos desde o respeito e o reconhecimento da sua autonomia, à vez que acordamos participar, à beira de outros agentes sociais e políticos, nos processos tendentes a umha reorganizaçom do campo independentista a meio ou longo prazo.
Espaço Irmandinho define a sua existência como “provissória”, porquanto entendemos que no independentismo galego se deve produzir umha suavizaçom e superaçom da atomizaçom e a dialéctica de conflito fraccional. É na materializaçom desse cenário desejado por milhares de independentistas galegas e galegos que a nossa rede organizativa situa a sua própria desapariçom, disolvendo-se como mais um dos ingredientes necessários num projecto estratégico de liberaçom nacional e social para a Galiza que ainda está por construir.
Espaço Irmandinho
